ПОСЛЕДНИ НОВОСТИ

Манифестација за популаризација на природните науки  „Ноември – Месец на науката“

Манифестацијата за популаризација на природните науки „Ноември – месец на науката“, е во организација на Македонското географско друштво, Македонското биолошко друштво, Сојузот на хемичарите и технолозите на Македонија, Друштвото на физичарите на Република Македонија, Сојузот на математичари на Македонија, Македонското астрономско друштво, Скопското астроном­ско друштво, Македонското еколошко друштво, Истражувачкото друштво на студенти географи „Природник“, Истражувачкото друштво на студенти биолози, и Природно-математичкиот факултет.

Настанот е наменет за учениците од основните и средните училишта и наставниците по природни науки, биологија, хемија, географија и математика. Оваа година настанот се одржа на Природно-математичкиот факултет во Скопје и тоа на 29 и 30 ноември за ученици од I-IV година. Истиот вклучуваше повеќе настани:

– научно-популарни предавања,

– натпревар во експеримент/изработка/ симулација/модел од ученик (во понатамошниот текст – експерименти),

– презентации на искуства од наставници,

– работилници,

– посета на лаборатории на ПМФ и

– други активности.

Делот од настанот „Ноември – месец на науката“ од областа на физика за учениците од средните училишта се одржа на 29 ноември во рамките на 43 Школа на млади физичари.

Секој поднесен опис на експеримент беше рецензиран од стручна рецензентска комисија. Само позитивно оценетите експерименти беа прикажани на настанот.

Секој ученик и секој наставник кој учествуваше на „Ноември – месец на науката“ доби сертификат за учество на настанот (за изведување експеримент, учество во работилница или како набљудувач), а беа доделени дипломи и награди на најдобрите учесници на натпреварот во експериментите од одредена област, како и на нивните ментори.

Нашите ученици постигнаа особено високи резултати и тоа :

  • Прва награда за ученичките Ангела Ефтимовска и Михаела Димитровска од IV година за експериментот Рубенова цевка
  • Втора награда за ученичките Сандра Милошева и Елена Анакиевска од IV година за експериментот Вакумска правосмукалка
  • Трета награда за учениците Антониј Цонев и Марија Мишева од II година за експериментот Електричен воз
  • Ментор на сите наградени ученици е професорот по физика Роберт Цветковски кој исто така доби прва награда за постигнатиот успех

Делот од настанот „Ноември – месец на науката“ од областа на биологија и математика за учениците од средните училишта се одржа на 30 ноември.

Ученичката Верица Ѓеоргиева под менторство на професорката по биологија Марина Конева освои прва награда за својот експеримент од областа на биологијата.

Експеримент се состоеше во докажување на влијанието на температурата и pH врз дејство на ензимите.Со експериментот успешно се докажа зависноста на pH и T со активноста на ензимите. Натпреварот имаше две етапи односно презентација на експериментот и поставување на прашања од страна на комисијата која за презентацијата и за одговорените прашања доделува поени.

Ученичката Евгенија Пандова освои втора награда од областа на математиката за нејзиното истражување за Седум мостови на Кенинсберг — математичка загатка  и еден од позначајните историски проблеми во  математиката. Градот Кенинсберг во Пруисија (денес Калинград, Русија) бил сместен на двата брега на реката Прегел во којашто се наоѓаат два големи острови — Кнајпхоф и Ломзе — коишто биле поврзани еден со друг или со крајбрежните делови на градот со седум мостови. Проблемот се состои во осмислување на прошетка низ градот, така што секој од мостот ќе биде преминет само еднаш. Притоа, за неприфатливо решение на проблемот се смета она коешто вклучува:

  1. пристигнување до остров или крајбрежен дел на градот без да се премине преку мост; или
  2. пристапување на било кој мост без да се премине преку неговиот друг крај.

Ојлер докажал дека проблемот нема решение. Тешкотијата со која се соочил бил развојот на соодветна техника на анализа и на последователните тестови кои го воспоставиле тврдењето со математичка строгост.

Успехот на нашите ученици под менторство на нашите особено ангажирани професори е неминовен, затоа што тие секојдневно ги поттикнуваат и влеваат неверојатно чувство на амбиција со една преданост од која произлегува љубов кон професијата, а тоа се огледува во успехот на нашите ученици.

Честитки за сите ученици и заедно да продолжиме да учествуваме во афирмацијата на нашите науки!

Меѓународен online натпревар по англиски јазик

На 29.11.2019 год., СОУ М.М.-Брицо за прв пат учествуваше на меѓународен онлајн натпревар по англиски јазик, организиран од Best In English, https://bestinenglish.org/ под патронажа на Министерство за Образование на Република Чешка.

Натпреварот е наменет за ученици од средните училишта од 14 до 18 годишна возраст кои имаат стекнато високи познавања од англискиот јазик во своето редовно образование, односно Б2 до С1 ниво според CEFR.

За натпреварот, 20 ученици од втора до четврта година гимназиско образование, ја имаа можноста да се натпреваруваат со уште околу 16.600 врсници ширум светот, да ги проверат своите знаења од граматиката на англискиот јазик како и вештините за читање со разбирање и слушање. Од вкупно 117 бодови неколку ученици со 97,5% успешност на тестот а вкупниот просек неофицијално на сите ученици од училиштето е окoлу 72%.

Официјалните резултати од овој исклучително ефикасен натпревар ќе бидат познати до крајот на декември и почетокот на јануари 2020 год. Учениците беа задоволни од натпреварот и содржинските делови на тестовите а ќе имаат можности да пристапуваат кон материјалите во следните 6 месеци. Ние како училиште ќе може да ги користиме како ексклузивни ИКТ наставни материјали, изработени по метод на стандардизирани тестови за полаѓање на меѓународни испити по Кембриџ програмата.

Како училиште одговоривме на потребната техничка опременост со информатичка технологија и докажавме дека може да имплементираме комплексни материјали во функција на мотивираност на учениците како и на нивниот напредок.

Иницијатор за имплементација и одговорно лице за организација на натреварот во училиштето e професор Желеанка Демирова.

Нашите спортисти повторно со успех

СОУ Методи Митевски -Брицо секогаш меѓу најдобрите. Фудбалерите најдобри на зонскиот футсал турнир во Оризари

Денес во кочанско Оризари, се одржаа зонските натпревари во футсал-машки за средни училишта.

Со две победи, 13 постигнати и 4 примени погодоци, машката екипа при гимназијата ,,Методи Митевски – Брицо” од Делчево беше најдобра на овој зонски турнир.

Резултати од турнирот:

СОУ “Гошо Викентиев” Кочани – СОУ “Миле Јаневски Џингар” М.Каменица -7:6

СОУ “Миле Јаневски Џингар” -М.Каменица – СОУ “М.М.Брицо” Делчево – 2:7

СОУ “ММ.Брицо”Делчево – СОУ “Гошо Викентиев” Кочани – 6:2

Младите од СОУ “Методи Митевски – Брицо” – Делчево се едуцираа за медиумска писменост

Со низа активности предвидени во проектот „Интернет суперхерои“, Делчево се вклучува во борбата со лажните вести и дава свој придонес во медиумската писменост во рамките на Деновите на медиумската писменост кои во нашата држава се спроведуваат во периодот од 22 октомври до 15 ноември. Денеска во организација на Регионалниот центар за застапување од Делчево во СОУ “Методи Митевски – Брицо” – Делчево се одржа јавна презентација на проектот „Интернет суперхерои“, кој ќе се имплементира наредните 5 месеци со можност младите да се вклучат во различни работилници, кинопроекции, инфоденови, дебати, советувања и други настани кои обработуваат различни аспекти од медиумската писменост.

Медиумски партнер на проектот е регионалната ТВ Стар, а проектот предвидува подготовка на 5 емисии од различни аспекти на медиумската писменост, изработка на промотивен материјал, како и организација на неделна кампања „Интернет суперхерои“. Родне Деолска од РЦЗ, координатор на проектот, истакна дека потребата да се работи на ваков проект произлегува, пред сѐ, од големиот број лажни вести и пропаганда со што паралелено се зголемува и потребата од медиумски писмени граѓани кои критички ќе ги оценуваат медиумските содржини.

Во регионот има млади со вештини на техничко ниво, знаат да работат со компјутер, да пишуваат документи, да пребаруваат на интернет, но со нив дополнително треба да се дискутира како се раѓаат и пишуваат вестите, како се декодира конкретна содржина, како да се заштитат од сајбер-насилство или како се одредува лажна вест.

Образованието, односно училишните клупи се најсоодветното место за градење аналитичко размислување, препознавање на лажните информации и логичките грешки. Со активни и медиумски писмени млади луѓе ќе дојде до генерации кај кои пропагандата ќе има мало влијание. Токму затоа овие денови на медиумска писменост во Делчево почнуваат од училиштата, рече Деолска.

За директорот на гимназијата Љупчо Прачкоски, проектот е чекор плус кон запознавање на младите со терминот медиумска писменост. Ние како средношколски центар ги поздравуваме овие активности, тоа е чекор напред за младите луѓе кои имаат можност преку ваквите активности да ги осознаат лажните вести и да дознаат многу работи што се случуваат во реалноста, а не се пренесени од медиумите како што треба. Благодарејки на ваквиот вид на работилници, младите ќе научат да добиваат правилни информации, а со тоа и правилно да ги пренесуваат на генерациите после нив, истакна Прачкоски.

На овој начин, нашата земја, се вклучува во одбележувањето на осмата Глобална недела на медиумска и информациска писменост на УНЕСКО, а за првпат активности се организираат и во градот Делчево. РЦЗ проектот го имплементира во соработка со Фондацијата Метаморфозис и Евротинк, а финансиран од Европската Унија, а поддршка има и од Агенцијата за аудио и аудиовизуелни медиумски услуги.

Победа на ракометарите на СОУ “Методи Митевски – Брицо” – Делчево

Машката селекција на гимназијата М.М.Брицо е победник во зонската лига во ракомет кој се одржа на 26.11.2019 во спортската сала М.М.Брицо. На овој турнир учество земаа најдобрите екипи од кочанската зона: СОУ М.М.Брицо- Делчево, СОУ Ванчо Прке- Виница и СОУ Гошо Викентиев-Кочани.

СОУ „М.М.Брицо“-Делчево

Во првиот натпревар екипата на СОУ М.М.Брицо беше подобра од селекцијата на Гошо Викентиев Кочани 26:23 (13:10), додека во вториот со резултат 26:21 (12:11) ја совлада екипата на Виница.Со овие две победи нашата екипа го освои првото место и обезбеди учество во регионалната ракометена лига.

Online натпревар по математика

Дизајниран да биде инклузивен и забавен, овој натпревар може да се користи како активност во училницата за ученици во средно образование.

Натпреварот е организиран од страна на McMaster University во Онтарио, Канада.Тој се одржува секоја година на 27 ноември и за интернационалните тимови нема натпреварувачки карактер, меѓутоа самото учество во него е многу позитивно искуство за нашите ученици.

Овој натпревар е веб-базиран и учеството во него е флексибилно, во смисла дека тестот кој содржи 10 проблеми може да се решава во било кое време од денот или како активност во училиштето во текот на 1 час. Оваа година нашето училиште учествуваше со 3 тима од по 2 ученика од трета година.

Успешно реализиран кампот на иновации на Junior Achievement Македонија во соработка со УТМС

Junior Achievement Македонија и Универзитетот за туризам и менаџмент Скопје на 26 Ноември 2019 година го реализираа најголемиот средношколски натпревар за иновации – Камп на иновации – натпревар на средношколци во претприемнички вештини.

На натпреварот учествуваа 52 средношколци од 13 средни училишта од 10 градови од целата територија на земјата кои се натпреваруват со поддршка на 13 ментори на задача за изнаоѓање иновативен производ за поголемо користење на хотелско сместување.

Преку тимска работа на бизнис иновациска идеа и составување на бизнис план, со пристап до интернет и технологија, применувајќи претприемнички вештини средношколците создадоа одлични бизнис планови кои беа оценети од страна на жири комисија – претставници од академска и бизнис заедница. СОУ “Методи Митевски – Брицо” од Делчево имаше 4 ученици кои учествуваа на овој натпревар. Тие со своите тимови успешно се претставија со своите бизнис иновациски идеи.

Покрај средношколците, настанот го посетија професори, ментори, претставници од институции и од бизнис заедницата, како и претставник од УСАИД и Министерот за образование и наука, г-дин. Арбер Адеми.

Натпреварот е поддржан од Американската агенција за меѓународен развој УСАИД, а го реализира организацијата Џуниор Ачивмент Македонија – член на светската мрежа Junior Achievement Worldwide, која е основана во 1919 година во соработка со Универзитетот за туризам и менаџмент Скопје.

Посета на “Vincinni”

Посета на учениците од хемиско-технолошката струка на Макпрогрес (Винчини) Виница и Центрифрути во Виница

Во оваа доба на консумеризам, не е ниту лесно, ниту едноставно да си прифатен, посакуван, уважуван и почитуван.

Производите од линијата на „Винчини“ и „Винчини Фајнест“, благодарение на своите квалитет, состав, вкус, арома и достапност, се уникатно слатко доживување за сите човечки сетила.

Учениците од прехранбената струка во Макпрогрес (Винчини) ги посетија погоните за производство на кекси и кандиторски производи наменети за странскиот пазар. Во овие погони го видоа процесот на производство на кексите, ги видоа тунелските печки во кои се врши печење на одредени производи и клештите во кои се внесени разни модели и се добиваат разни солени производи како рибички и други солени грицки. Производите потоа се миксираат во различен процентуален однос и се пакуваат во специјална амбалажа која се формира автоматски во машините и во кои дозирањето на производите е автоматско. Во индустријата се работи по HASSP систем, ISO стандарди и HALAL. Лабораторијата ја посетија на професорите бидејќи за учениците не беше дозволено. Учениците ја посетија индустријата за безалкохолни пијалоци каде го видоа процесот на производство на газирани и негазирани производи.

При посета на индустријата за безалкохолни пијалоци “Центрифрути” учениците видоа автоматска линија за добивање на газирани и негазирани пијалоци (вода и сокови). Тие го пратеа процесот на добивање на амбалажата (шишињата) и автоматското дозирање и затворање на шишињата со безалкохолниот пијалок. Индустријата е снабдена и со филтри за микробиолошко прочистување на водата пред самото амбалажирање. Процесот на производство на сокови протекува на начин кога се газира H2O со CO2, а потоа се додава концентратот. Во индустријата постои и лабораторија која ја изведува потребната анализа на суровината и производите. Во индустријата видоа современа технологија на производство на безалкохолни пијалоци.


Прва работилница од проектот „Со селекција на отпадот до почиста животна средина“

Преку селекцијата на најчесто создаваниот отпад во јавните институции, пластика и хартија, се поттикнува општествена одговорност на поединецот за неговото влијание врз зачувување на природата.
Преку намалување на емисијата на различни полутанти во животната средина ќе се придонесе за намалувањето на нејзиното загадување. Предуслов за постигнување на ваквата цел е отпадот да се селектира за да може да се рециклира или повторно да се употребува.


Преку проектот „Со селекција на отпадот до почиста животна средина“ се планира да се постигнат следните цели:
1. Да се подигне еколошката свест на учениците во образовните институции
2. Да се поттикнат учениците на општествено одговорни активности преку проширување на нивната активност на локалните институции
3. Да ги променат своите навики, од загадувачи да преминат во зачувувачи на животната средина
4. Да добијат економски бенефит

Со цел зачувување на чистиот амбиентален воздух од општината го искористија настанот за да ја најават акцијата за пошумување која ќе се реализира на 23 ноември 2019 година. На оваа акција учество ќе земат и нашите ученици со своите професори.

Соработка меѓу средните училишта во регионот

Денес во делчевската гимназија беше потпишан Меморандум за соработка помеѓу средношколските воспитно образовни установи од Делчево, Берово и Кочани. Меморандумот го потпишаа Љупчо Прачкоски, директорот на СОУ „М.М.Брицо“, Сашко Корчовски, директор на СОУ „Ацо Русковски“ од Берово и Игор Христов, директор на СОУ „Љупчо Сантов“ од Кочани.

Потпишувањето на овој меморандум како што истакна Љупчо Прачкоски, директор на делчевската гимназија е само продолжување на претходната соработка помеѓу трите гимназии.

-Ова се гимназии со кои имаме долга соработка и еве денес и официјално ја потврдуваме на еден заеднички документ преку кој ќе можеме да ги зацврстиме нашите идеи и да ги преточиме во заеднички проекти во интерес пред се на самите ученици. Учениците се тие кои преку своите заеднички активности во иднина ќе придонесат да бидеме успешен пример, не само во источниот дел на Македонија туку и во цела држава, истакна Прачкоски.

За самите ученици со овој документ тие ќе имаат можност заеднички да соработуваат во повеќе области од воспитно-образовниот процес.

-Многу сме среќни и возбудени заради оваа соработка, бидејки имаме одлични идеи и ако се споиме како тим, ние децата од Делчево и Берово можеме да постигнеме многу“, рече Милена Глигорова од кочанската гимназија.

-Среќен сум што нашите училишта ќе соработуваат и притоа ќе имаме прилика да соработуваме бво многу проекти“, истакна Леонид Петровски од делчевската гимназија.

-Очекуваме големи проекти за размена на информации и знаења и големи награди кои заедно ќе ги добиеме, додаде Иван Стојановски од ОСУ „Ацо Русковски“ од Берово.

Во рамки на денешните активности гостите од Кочани и Берово имаа можност да поразговараат околу првите конкретни проекти кои би ги реализирале како дел од оваа заедничка соработка. Исто така се запознаа со културно-историските знаменитости на Делчево.